José Antonio Fernández: «Empanadas Ternura elabora receitas novas con sabor antigo»

A empresa combina receitas tradicionais e novos sabores na súa oferta de empanadas e pratos preparados, con presenza no mercado nacional e internacional

Empanadas Ternura aposta por levar a empanada galega a outro nivel, combinando a tradición culinaria con ingredientes de calidade, elaboración artesanal e novas propostas de sabores. A empresa, que tamén comercializa pratos preparados e produtos doces, busca ampliar mercados e contribuír á proxección da gastronomía galega, cada vez máis recoñecida dentro e fóra da comunidade.

Ternura nace co propósito de poñer en valor a empanada galega e demostrar que un produto tradicional tamén pode ter unha identidade gastronómica propia. Como xurdiu o proxecto e como foi a evolución da empresa desde os seus inicios ata hoxe?

A inquietude xurdiu cando descubrimos que no mercado podería ter cabida unha empanada Gourmet, preservando todo o sabor e a imaxe das mellores empanadas galegas. Tratamos de facer a empanada que, cando comes un trozo, o teu corpo xa che pide que repitas porque che está sentando ben, polos ingredientes naturais con que as facemos.

A empanada é un dos produtos máis representativos da gastronomía galega, pero tamén unha elaboración con moita historia e tradición. Que importancia ten manter esa esencia e, ao mesmo tempo, apostar por novas receitas e combinacións de sabores?

A elaboración facémola coas mellores materias primas: fariñas certificadas sen aditivos, aceites virxes extra e de xirasol, e cebola traballada na nosa cociña. O acabado faise a man, tanto o recheo como o peche; unha vez rematado, conxélase con nitróxeno e sérvese aos clientes conxelado, perfectamente enfornado. Para que o seu consumo preferente sexa dun ano dende a data de fabricación, consérvase conxelada a unha temperatura de -20 °C.

Para poder consumila, o cliente pon o forno a 200 °C; no momento en que chega a esa temperatura, directamente desde o conxelador mete a empanada –sen desconxelar– e, en apenas 15 minutos, ten un produto recén enfornado, cunha textura crocante e moi saborosa.

«A elaboración facémola coas mellores materias primas: fariñas certificadas sen aditivos, aceites virxes extra e de xirasol, e cebola traballada na nosa cociña»

A calidade dun produto depende en boa medida da materia prima e do coidado que hai detrás de cada elaboración. Como é o voso proceso de traballo e que aspectos considerades fundamentais para conseguir que as vosas empanadas e demais produtos teñan unha identidade propia?

A oferta de sabores vai dende os máis tradicionais: atún, bacallau, carne, vieiras, polbo, etc… ata outros que son un pouco menos comúns como o polo ao curry, o bacallau cunha receita portuguesa (á moda de Braga) ou cogomelos con gambas, mexillóns con chourizo. A nosa oferta é de 16 recheos diferentes en 3 formatos: 600 g, 1400 g e 1900 g, todas con forma rectangular.

Ademais desta variedade de empanadas, tamén dispoñemos de outras sen glute, que están listas para consumir unha vez desconxeladas; nesta gama hai empanadillas de 175 g e empanadas de 500 g de atún, carne e vegana. Estes produtos son froito da colaboración con outro obradoiro especializado en produtos sen glute, que ademais é un centro de emprego para a inclusión social.

Ademais das empanadas, Ternura conta cunha oferta que inclúe pratos preparados e elaboracións doces tradicionais. Como xorde a decisión de ampliar o catálogo e que papel desempeña a cociña galega no desenvolvemento de novos produtos?

Tamén elaboramos, coa marca LUME, pratos de Quinta Gama (V Gama) feitos coa filosofía de «Tenrura», onde prima a calidade de elaboración e os mellores ingredientes. Temos unha gran variedade de pratos como o caldo galego, callos á galega, salpicón de gambón e peixe sapo, ensaladilla rusa, albóndegas de pescada, calamares na tinta con arroz, etc., en frío positivo e conxelado, listos para meter ao forno, nun recipiente de cociña ou no microondas.

«A nosa oferta é de 16 recheos diferentes en 3 formatos: 600 g, 1400 g e 1900 g, todas con forma rectangular»

Os produtos galegos están a gañar presenza en novos mercados e espazos de promoción gastronómica. Que importancia teñen as feiras, os eventos e as iniciativas de apoio ao produto local, como a campaña A Paisaxe que Sabe, da Deputación da Coruña, que apoia o Circuíto TUR 43 Galicia Calidade, para dar a coñecer as vosas elaboracións e achegar a gastronomía galega a novos públicos dentro e fóra de Galicia?

A localización dos nosos clientes está en Galicia, España e tamén exportamos aos EE.UU., onde os produtos galegos, ademais de pola súa calidade, son moi recoñecidos porque se está dando a coñecer a nosa terra a través de campañas de información como a publicidade do Xacobeo, Turismo, etc.

«Ademais desta variedade de empanadas, tamén dispoñemos de outras sen glute, que están listas para consumir unha vez desconxeladas»

Como ben di, a gastronomía galega vive un momento de crecente recoñecemento dentro e fóra de Galicia. Como valorades esta evolución e que oportunidades ofrece para empresas como Ternura, que traballan con produtos tan ligados á tradición culinaria do país?

A valoración do que creo que está pasando co recoñecemento dos produtos elaborados en Galicia é a seguinte: por unha parte, a imaxe que temos fóra da comunidade de materia prima de calidade; e, pola outra, os profesionais nas distintas actividades que día a día o están facendo mellor, conservando a tradición galega e dándolle un toque máis acorde coas novas xeracións. Receitas novas con sabor antigo, onde podes recoñecer os ingredientes de Galicia.